الماتى اكىمى باۋىرجان بايبەك كوپبالالى انالارمەن كەزدەستى. انالاردىڭ بارلىق سۇراقتارى مەن ۇسىنىستارىن تىڭداعان اكىم مەگاپوليستەگى تۇرمىسى تومەن كوپبالالى وتباسىلارعا قولداۋ كورسەتۋ ءۇشىن قالالىق دەڭگەيدە اتقارىلاتىن الەۋمەتتىك شارالاردى كەڭىنەن ءتۇسىندىردى.
بۇعان دەيىن مۇنداي كەزدەسۋلەر قالانىڭ بارلىق اۋداندارىندا وتكەن بولاتىن. باسقوسۋ بارىسىندا كوپبالالى انالاردى الەۋمەتتىك جاردەماقى مولشەرىن ارتتىرۋ, تۇرعىن ءۇي مەن تۇرمىستىق جاعدايدى جاقسارتۋ, ەڭبەكپەن قامتۋ, بالالاردى بالا باقشاعا ورنالاستىرۋ جاعدايلارى تولعاندىراتىنى ايتىلدى.
«مەملەكەت باسشىسىنىڭ تاپسىرماسى بويىنشا ۇكىمەتتىك توپ جۇمىس ىستەۋدە, كەزدەسۋلەردە ايتىلعان بارلىق ۇسىنىستار سارالانادى جانە ەسەپكە الىنادى. بۇلاردان وزگە, ءبىز قالالىق دەڭگەيدە كوپبالالى انالارعا قولداۋ كورسەتۋدىڭ ناقتىلى مەحانيزمى جيناقتالعان پارمەندى شارالاردى «نۇر وتان» پارتياسىنىڭ كەزەكتەن تىس كونفەرەنتسياسىندا اشىپ ايتتىق. مىسالى, كامەلەتكە تولماعان 4 جانە ودان دا كوپ بالالارى بار تۇرمىسى تومەن وتباسىلارعا تۇرعىن ءۇي الۋدىڭ العاشقى جارناسىنىڭ تولەمىن سۋبسيديالاۋ مۇمكىندىگى قاراستىرىلاتىن بولادى», – دەدى باۋىرجان بايبەك.
تۇرمىسى تومەن كوپبالالى وتباسىلارعا قولداۋ كورسەتۋدىڭ كەشەندى شارالارى بويىنشا مۇگەدەك بالانى ۇيدە وقىتۋعا كەتەتىن شىعىننىڭ ورنىن تولتىرۋ ءۇشىن بەرىلەتىن ادرەستىك كومەك پەن قيىن ومىرلىك جاعداي تۋىنداعان كەزدە ءبىر رەت كورسەتىلەتىن الەۋمەتتىك كومەك كولەمىن ارتتىرۋ جوسپارلانعانىن اتاپ وتۋگە بولادى.
ايتا كەتەرلىگى, شاھار باسشىسى بۇرىندارى تۇرمىسى تومەن كوپبالالى وتباسىلاردىڭ ەكىنشى بالاسىنان باستاپ بالا باقشا شىعىنىنا وتەماقى تولەۋدى قاراستىرۋدى تاپسىرعان بولاتىن. كوپبالالى وتباسىلاردىڭ كوممۋنالدى قىزمەتكە, سۋمەن قامتۋعا قاتىستى ىستىق جانە سۋىق سۋ ەسەپتەگىش قوندىرعىلارىن ورناتۋعا كەتكەن شىعىندارىنا جۇمسالاتىن ادرەستىك كومەك كولەمى دە نازارعا الىنباق.
كوپبالالى وتباسىلاردىڭ زاڭنامالىق جانە پسيحولوگيالىق كەڭەستەرگە ءزارۋ ەكەنى ەسكەرىلىپ, تاياۋ ارادا «باقىتتى وتباسى» قالالىق جوباسى ىسكە اسپاق. سونداي-اق شاھاردا كوپبالالى انالار ورتالىعى قۇرىلاتىن بولادى. ءبىر تەرەزە قاعيداسى بويىنشا جۇمىس ىستەيتىن سەرۆيستىك ورتالىق ارقىلى كوپبالالى انالاردى جۇمىسقا تارتۋ ءىسى قولعا الىنباق.
الماتى اكىمدىگى تۇرمىسى تومەن وتباسىلار ءۇشىن الەۋمەتتىك جۇمىس ورىندارىن ۇلعايتۋ جانە ستيپەنديا بەرىلەتىن تەگىن قىسقا مەرزىمدى كۋرستار ۇيىمداستىرۋ مۇمكىندىگىن نازارعا الىپ وتىر.
وسىعان دەيىن باۋىرجان بايبەك نەگىزسىز شىعىنداردان ارىلۋدى ۇسىنعان ەدى. قالا باسشىسى الەۋمەتتىك سيپاتى بار شەشىمدەر قابىلداۋ ءۇشىن الماتى اكىمدىگىنىڭ «نۇر وتان» پارتياسى فراكتسياسىنىڭ مۇشەلەرىمەن بىرگە بيۋدجەت شىعىندارىن تۇراقتى تەكسەرىپ, وڭتايلاندىرۋ جۇرگىزگەنىن ايتتى. ناتيجەسىندە ۇنەمدەلگەن قارجى بۇرىنعىداي ازاماتتاردىڭ ءوتىنىشى بويىنشا الەۋمەتتىك ماسەلەلەرگە جۇمسالادى. ولار – جاڭا جۇمىس ورىندارىن قۇرۋ, تۇرمىسى تومەن جاندارعا, اسىرەسە كوپبالالى انالارعا قولداۋ كورسەتۋ سپەكترىن ۇلعايتۋ, باسقا الەۋمەتتىك شارالاردى جۇزەگە اسىرۋدى كوزدەيدى.
ارمان وكتيابر,
«ەگەمەن قازاقستان»
الماتى